जिल्हा परिषद शिक्षकांबाबत करण्यात येणाऱ्या टीका आणि वक्तव्यांवरून एका सामाजिक कार्यकर्त्याने संबंधित आमदारांना खुले आव्हान देत सार्वजनिक चर्चेची तयारी दर्शविली आहे. "तुम्ही कधीही चर्चा करण्यासाठी या किंवा मला कुठे यायचे ते सांगा, तुमच्या प्रत्येक प्रश्नाचे उत्तर देण्यास मी तयार आहे," असे त्यांनी स्पष्टपणे म्हटले आहे.
सदर कार्यकर्त्याने जिल्हा परिषद शिक्षकांना लक्ष्य करण्याचे प्रकार तात्काळ थांबविण्याची मागणी केली आहे. "मी स्वतः जिल्हा परिषद शिक्षक नाही, मात्र त्यांच्या कामकाजाचा जवळून अभ्यास केलेला आहे. त्यामुळे शिक्षकांवर होणारी अन्यायकारक टीका योग्य नाही," असे त्यांनी नमूद केले.
त्यांनी राज्यातील शिक्षण व्यवस्थेची तुलना इतर राज्यांशी करण्याची गरज व्यक्त केली. "इतर राज्यांमधील शिक्षण धोरण, त्यासाठीचा अर्थसंकल्प आणि शैक्षणिक सुविधा यांचा अभ्यास केल्यानंतरच शिक्षकांवर आरोप केले पाहिजेत," असे ते म्हणाले.
जिल्हा परिषद शिक्षकांवर शैक्षणिक कामांबरोबरच विविध अशैक्षणिक जबाबदाऱ्या टाकल्या जात असल्याचा आरोपही त्यांनी केला. जनगणना, बीएलओची कामे, निवडणूक प्रक्रिया, मध्यान्ह भोजनाचा हिशोब, विविध सर्वेक्षणे, प्रौढ साक्षरता वर्ग, बैठका आणि इतर प्रशासकीय कामांमुळे शिक्षकांवर अतिरिक्त ताण येत असल्याचे त्यांनी सांगितले.
याशिवाय अनेक शाळांमध्ये शिक्षकांची कमतरता असल्याचा मुद्दाही त्यांनी उपस्थित केला. "सात वर्ग असलेल्या शाळांमध्ये केवळ दोन किंवा तीन शिक्षक कार्यरत असतात. अशा परिस्थितीत एखादा शिक्षक रजेवर गेला किंवा आजारी पडला तर विद्यार्थ्यांचे शैक्षणिक नुकसान होते. त्याची जबाबदारी कोण घेणार?" असा प्रश्न त्यांनी उपस्थित केला.
शाळांमधील मूलभूत सुविधांच्या अभावाकडेही त्यांनी लक्ष वेधले. अनेक ठिकाणी गळकी इमारती, स्वच्छतागृहांची कमतरता, वीज, पाणी आणि पंख्यांसारख्या आवश्यक सुविधांचा अभाव असल्याचे त्यांनी सांगितले. या समस्या सोडविण्याऐवजी शिक्षकांवर टीका करणे योग्य नसल्याचे त्यांनी स्पष्ट केले.
शिक्षण व्यवस्थेतील वास्तव परिस्थितीचा अभ्यास करूनच वक्तव्ये करावीत, तसेच शिक्षकांविषयी आदराची भूमिका ठेवावी, अशी मागणी त्यांनी केली. या वक्तव्यामुळे शिक्षकांच्या प्रश्नांवर आणि शिक्षण क्षेत्रातील मूलभूत समस्यांवर नव्याने चर्चा सुरू होण्याची शक्यता व्यक्त केली जात आहे.
Post a Comment
0 Comments